logo

21st-22nd August 2017

Borneo Convention Centre Kuching,
Kuching, Sarawak, Malaysia.

Perintah nengeri deka ngatur ICAAS 2017: Uggah

KUCHING: Perintah nengeri deka ngatur aum renggat antarabansa iya nya Agriculture and Agro-Based Industry Sarawak 2017 (ICAAS 2017) kena 21 nyentuk 22 Ogos, di BCCK ditu.

Sapit Kepala Menteri, Datuk Amar Douglas Uggah Embas madah, aum keterubah nya ti berambai leka jaku ‘Transforming Agriculture through Commercialisation’ lalu Kepala Menteri Datuk Amar Abang Johari Tun Openg deka nyadi patron sereta meri jaku pengelalu.

Iya madahka aum besai renggat antarabansa nya beguna amat kelebih agi ke sektor betanam betupi ti nyadi sektor ulih ngurangka penyeranta enggau ulih ngangkatka tikas pengidup peranak menua pesisir Sarawak.

“Senipak enggau inisiatif transformasyen ekonomi perintah nengeri, kitai patut ngelala sereta ngemeranka polisi ti meri empas manah, chara ngemansang sereta model dagang ke ulih mai penyungkak ngagai penumbuh sektor tu.

“Nya alai aum besai renggat antarabansa tu ngena amat sereta nyadi pelasar endur besilih penemu pasal mekanisma enggau chara baru ke dipeda udah mai pemujur ba nengeri bukai di Malaysia sereta menua bukai, ke ulih diterima sereta dikena di nengeri tu,” ku iya.

Uggah ke mega Menteri Betanam Betupi Moden, Tanah Adat enggau Pemansang Kandang Menua mansutka pekara nya ba aum pengarang berita ICAAS 2017 ke diatur ba Ringkat 2, Wisma Bapa Malaysia ditu, lemai kemari.

Batang objektif aum nya diatur, ngambika ulih bekunsi penemu enggau chara ti pemadu engkeman dikena dalam industri bepelasarka betanam betupi enggau industri betanam betupi sereta ngiga sistem servis betanam betupi ti bisi empas besai dikena mai transformasyen ng agai sektor betanam betupi.

“Objektif kitai ngatur aum tu mega nyadika peluang kitai nemu chara ngena teknologi digital dikena ngangkatka pemansang sektor betanam betupi ti tegap sereta ulih besemekih.

“Senipak bendar enggau juluk perintah nengeri dalam Digital Ekonomi, chara ngena teknologi digital patut dikemerat dikena ngemudah enggau ngenyampat pemansang betanam betupi ti tegap sereta ulih besemekih. Tu dikumbai insur paradigma ba semua orang ti bisi pemerat ba pekara nya,” ku iya.

Kelimpah ari nya lebuh ditanya bekaul enggau chara narit raban biak kelebih agi ke baru gradute ngambi ngemeranka industri betanam betupi, Uggah madahka diri arap bendar teknologi ulih narit raban nya kelimpah ari industri nya ulih meri penatai pemisi ti tinggi.

“Kemari (ensanus) aku bisi betemu enggau Datuk Idris Jala, iya becherita enggau aku maya iya di Kenya seiku indu biak mantaika software, sida iya din ngena telefon binching aja, nadai telefon pintar.

“Lalu ngena teknologi ke dikemisi nya, semua sida ke betanam betupi semina ngena telefon binching ngambika sama ulih begulai nyual produk sida.

“Nya alai bemalinka nya kitai deka ngiga teknologi ti manah ke ulih digaga nyadika industri betanam betupi ‘trendy’. Kitai arap bendar chara tu ulih narit ati rebak baru,” ku iya seraya madahka pekara nya deka dikerandau dalam isu ke-4, iya nya Digital Betanam Betupi.

Ngenang baru pasal aum besai nya, dipelabaka urung 1,500 iku pesereta ari sektor betanam betupi ari dalam menua tu enggau menua tasik deka nyereta aum besai, kelimpah bala akademik enggau institusyen pemansik enggau sektor peribit kelebih agi ari menua ASEAN.

Bisi empat isu deka dipejuraikan dikena ngenukuka kuing industri tu di Sarawak iya nya Modernisation and Commercialisation of Agriculture: Scenario and Trends; Journey towards Transformed Agriculture; Stakeholders’ Integrations along the Supply Chain enggau Digital Agriculture.

Dipelabaka bisi 20 iku pemeri licha ari menua tu enggau menua luar ke tebilang sereta pakar dalam industri tu deka bekunsi penemu, peneleba enggau pengelandik sida enggau bala pesereta.

Kelimpah ari nya pengawa pemandang mega bisi diatur ti mandangka produk betanam betupi asil ari menua tu, menua tasik, sektor peribit, institusyen enggau ejensi perintah.

Nitih ku iya dikena ngenukuka aum besai nya mujur dipejalaika, sebengkah komiti ditumbuhka betuaika Sapit Sekretari Perintah Nengeri (Transformasyen Sosio Ekonomi) Datu Ismawi Ismuni sereta dipasuk ejensi enggai opis perintah ke bekaul.

Sama bisi ba aum pengarang berita ICAAS 2017 kemari, Menteri Muda Pemansang Tanah Adat Datuk Roland Sagah, Direktor Opis Betanam Betupi Sarawak Datu Lai Kui Fong enggau ke bukai.